काठमाडौं : आरती साहले न्याय नपाएको विरोधमा उनका परिवार सहित केही युवाहरूले कपाल मुन्डन गराएका छन् ।
साहकी न्यायको लागि काठमाडौं माइतिघरमा धर्नामा बसेको शनिबार ८५ औं दिन पुग्न लाग्दा पनि सरकार अन्धो र बहिरो भएको भन्दै ११ जनाले कपाल मुन्डन गराएका हुन् ।
हिन्दु धर्मअनुसार मरिसकेको मान्छेको श्राद गर्ने परम्पराअनुसार शुक्रबार बिहान माइतिघरमै परिवार सहित युवाहरूले आफ्नो कपाल मुण्डन गराएका हुन् ।
आरती साहलाई न्यायको माग गर्दै आरतीको परिवार माइतीघर मण्डलामा धर्ना बसेको छ ।
जनकपुरकी २२ वर्षीया दुई महिने गर्भवती साहकी दाइजोको निहुमा हत्या भएको भन्दै आरतीको परिवार विगत दुई महिनाभन्दा धेरै समयदेखि धर्नामा बस्दै आएको छ ।
धनुषाको मिथिला बिहारी नगरपालिका-३ मिथिलेशवर मौवाही घर भई जनकपुरधाम-९ थापा चोकमा रहँदै आएकी साहको दाइजोका कारण उनको हत्या गरिएको माइतीपक्षको आरोप छ ।
साहकी शव उनी सुत्ने कोठामा पासो लगाई झुण्डिएको अवस्थामा गत जेठ ७ गते भेटिएको थियो ।
साहकी माइती पक्षले प्रहरीले पैसाको लेनदेन गरी मुद्दा कमजोर पारेको आरोप लगाएको छ ।
जनकपुरमा न्याय पाउने आश नरहेकाले उनीहरू काठमाडौं आएर धर्ना बसेका हुन् । : देश सञ्चार
