बर्दिवा : सिन्धुलीबाट शिक्षकहरु आन्दोलनमा सहभागी हुन काठमाडौं जाँदै भ्यान दुर्घटना भएको छ । शुक्रबार सिन्धुलीको सुनकोशी गाउँपालिका-३ बोहोरेटारमा ००१ ज ००६२ नम्बरको इलेक्ट्रिक जीप दुर्घटना हुँदा १० जना घाइते भएका छन् ।

घाइते हुनेहरूमा कमलामाई-६ की निरकुमारी चालिसे, कमलामाई-५ की कमला घिमिरे, तिनपाटन-१० का राजन कार्की, कमलामाई नगरपालिका ६ का सरोज थापा, कमलामाई-१ का मुकुन्द थापा, भुवन थापा, कमलामाई-४ की बविता देवकोटा, बनेपा-१० की गार्की बस्नेत, कमलामाई-६ का विष्णु ढकाल र निश्चल ढकाल रहेका छन् ।

घाइतेमध्ये तिनजनाको अवस्था गम्भीर रहेको जिल्ला प्रहरी कार्यालय सिन्धुलीले जनाएको छ । घाइते सबैलाई धुलिखेल अस्पताल पठाएको छ । घाइतेहरुकाे अधिकांशको हात, खुट्टा र टाउकोमा चोट लागेको छ । तिब्र गतिमा रहेको गाडी अनियन्त्रित भई सडकको बायाँ साइडको नालीमा खसेको थियो । गाडीमा ११ जना सवार थिए ।

चालक कमलामाई नगरपालिका–८ का तेजबहादुर कार्कीलाई प्रहरीले नियन्त्रणमा लिएको छ । घटना बारे थप अनुसन्धान भई रहेको प्रहरीले जनाए ।