मुकेश झा
सर्लाही, असाेज १९ गते । 
सर्लाहीको ईश्वरपुर नगरपालिका-१३ बाट मोटरसाइकलमा जडान गरिएको जिपिएसको सहायताले चोरिएको मोटरसाइकल सहित चोरलाई प्रहरीले पक्राउ गर्न सफल भएका छन्  ।

मोटरसाईकल चोरीको आरोपमा प्रहरीले ईश्वरपुर-१३ का २८ वर्षीय रामकरण महतोलाई पक्राउ गरेको हो । लालबन्दीबाट सुबोध घिमिरेको चोरी भएको मोटरसाईकललाई खोज्दै जाँदा मोटरसाईकल चोर रामकरण महतोलाई पक्राउ गर्न सफल भएको सर्लाहीका प्रहरी प्रवक्ता प्रहरी नायव उपरीक्षक दिपेन्द्र पंजियार थारुले जानकारी दिए ।

लालबन्दीबाट चोरिएको मोटरसाईकलमा जिपिएस जडान गरिएको थियो । जिपिएसको आधारमा मोटरसाईकल चोरलाई प्रहरीले पक्राउ गर्न सफल भएको उनले बताए ।

मोटरसाईकल चोर महतोको घरबाट अन्य चोरीका मोटराईकल, मोटरसाईकलका पार्ट्सहरु, मोटर पम्पहरुसमेत बरामद भएको ईलाका प्रहरी कार्यालय ईश्वरपुरले जनाएको छ ।

महतोले चोरीको मोटरसाईकललाई आफ्नै घरमा ल्याएर पार्टपुर्जा खोल्ने, नम्बर चेन्ज गर्ने लगायतका काम गर्दै आएका थिए । प्रहरीले महतोको घरबाट पार्ट-पार्ट छुट्याईएको अवस्थामा धेरै मोटरसाईकलको समानहरु बरामद गरेको छ ।

महतोसँग चोरीमा संलग्न गिरोहका अन्य सदस्यहरुकोको खोजी भइरहेको प्रहरीले जनाएको छ ।