शुभनारायण यादव
सप्तरी, मंसिर १६ गते ।
पूर्व–पश्चिम राजमार्ग अन्तर्गत सप्तरीको सुरुङ्गा नगरपालिका वडा नम्बर ४ को कदमाहामा शनिवार ट्रकले मोटरसाइकललाई ठक्कर दिँदा एक जनाको ज्यान गएको छ ।
दुर्घटनामा मोटरसाइकल चालक सप्तरीको सुरुङ्गा नगरपालिका वडा नम्बर ४ का स्थानीय ३५ वर्षीय मो. हारुनको घटना स्थलमै ज्यान गएको हो ।
पूर्वबाट पश्चिमका लागि छुटेको म प्र ०१–००१ ख ०३६७ नम्बरको ट्रकले विपरीत दिशाबाट आउँदै गरेको मोटरसाइकललाई ठक्कर दिँदा मोटरसाइकल चालकको ज्यान गएको सप्तरीका प्रहरी प्रवक्ता ढुण्डीराज नेउपानेले जानकारी दिनुभयो ।
ज्यान गएका हारुनको शव परीक्षणका लागि गजेन्द्रनारायण सिंह अस्पताल राजविराज ल्याइएको तथा ट्रक र चालकलाई नियन्त्रणमा लिइ आवश्यक अनुसन्धान अगाडि बढाइएको सप्तरीका प्रहरी प्रवक्ता नेउपानेले जानकारी दिनुभयो । दुर्घटना पश्चात् आक्रोशित स्थानीयवासी र आफन्तले केहीबेर पूर्व–पश्चिम राजमार्ग समेत अवरुद्ध गरेका थिए ।
