फिदिम, मंसिर २१ गते ।
उत्कृष्ट कमब्याक गर्दै झापाको बिर्तामोड युनाइटेड क्लब यहाँ जारी प्रथम किरात गोल्डकपको फाइनलमा प्रवेश गरेको छ । फिदिम माविको खेल मैदानमा आज भएको अन्तिम सेमिफाइनल खेलमा ताप्लेजुङको कर्णसिं सोनाम स्मृति क्लबलाई २-१ गोलअन्तरले पराजित गर्दै बिर्तामोडले फाइनलमा स्थान सुरक्षित गरेको हो । १-० गोलले पछि परेको अवस्थालाई उल्टाउँदै बिर्तामोडले बाजी मारेको हो ।

ताप्लेजुङका लागि खेलको ७ मिनेटमै दिपेश लिम्बूले गोल गरेर अग्रता दिलाएका थिए । तर, ताप्लेजुङको अग्रता पहिलो हाफसम्म पनि टिक्न सकेन । याेगेश गुरूङकाे कप्तानीमा मैदान उत्रिएकाे बिर्तामाेडका लागि राेमन भुजेल र प्रदिप बुढाथाेकीले गाेल गरे । पहिलो हाफकै ३१औँ मिनेटमा बिर्तामोडका लागि रोमन भुजेलले गोल गरेर टिमलाई खेलमा फर्काए । उनले पेनाल्टीमार्फत गोल गरेर १-१ गोलको बराबरीमा ल्याए । यस्तै, पहिलो हाफकै इन्जुरी समयमा प्रदिप बुढाथोकीले गोल गर्दै अग्रता दोब्बर बनाए । दोस्रो हाफमा दुवै टोलीले थुप्रै गोल गर्ने अवसर खेर फ्याँकेका थिए । रोमाञ्चक खेलको म्यान अफ दी म्याच बिर्तामोडका प्रदिप बुढाथोकी भए । उनले नगद ५ हजार पाए ।

हिजो भएको पहिलो सेमिफाइनल खेलमा आयोजक पाँचथर एफसीलाई पराजित गर्दै मोरङको डाँगीहाट एफसी फाइनलमा प्रवेश गरिसकेको छ । फाइनल खेल मंसिर २३ गते हुनेछ । प्रतियोगिताको विजेताले नगद ४ लाख ४ हजार ४४४ र उपविजेता टोलीले नगद २ लाख २ हजार २२२ सहित आकर्षक ट्रफी पाउने छ । विधागत पुरस्कारतर्फ १० हजार सर्वोत्कृष्ट बन्ने खेलाडीले नगद २५ हजार पाउने आयोजकले जनाएको छ ।