सर्लाही, पुस १९ गते ।
जंगली हात्तीले सर्लाहीको बरहथवा नगरपालिका-९ पैंतालीस बिघामा एक घर भत्काइदिएको छ । मंगलबार राती सावाँ २ बजेको समयमा जंगलबाट आएका २ हात्तीले स्थानीय अप्सरा ठकुरीको दुई तल्ले काठको घर (दुमहला) को तल्लो तल्ला भत्काएको इलाका प्रहरी कार्यालय बरहथवाका प्रहरी नायव उपरीक्षक (डिएसपी) गंगा बहादुर थापाले जानकारी दिए ।

अँध्यारोको बेला अचानक आएका हात्तीले घर भत्काउन थालेपछि गाउँभरि हो–हल्ला भएको र घरधनीले घरको माथिल्लो तल्लामा लुकेर बसेका थिए । हात्तीको उपद्रवबाट घरभित्रका अन्नबाली नष्ट भएको छ भने घर भत्किएर ती परिवारको बिजोग बनाएको छ । हात्तीको आक्रमणबाट मानवीय क्षति नभएको प्रहरीले जनाएको छ ।