नविन चौधरी
जलेश्वर, मंसिर ७ गते ।
नेपाली यू–१९ क्रिकेट टोलीकी कप्तान पूजा महतोलाई महोत्तरी गाउँ पालिकाले सम्मान गरेको छ ।

महोत्तरी गाउँपालिकाका अध्यक्ष दिलिप पाण्डेको प्रमुख आतिथ्यमा भएको कार्यक्रममा पूजाको कप्तानीमा नेपाली यू–१९ महिला क्रिकेट टोलीले इतिहास रच्दै आईसीसी यू–१९ महिला विश्वकप क्रिकेटमा छनोट हुन सफल भएकोमा महोत्तरी पालिकाले नगद सहित सम्मान गरेको हो ।

शुक्रबार पालिकाद्वारा आयोजित एक समारोहका बीच पालिकाका प्रमुख पान्डेले नगद ५१ हजार सहित प्रशंसा पत्र र दोसल्ला ओढाएर सम्मान गरेको हो । कार्यक्रममा अध्यक्ष पाण्डेले क्रिकेट खेलकुदको लागि पालिकाले हरसम्भव प्रयास र सहयोग गर्ने प्रतिवद्धता व्यक्त गरे ।

यस्तै प्रमुख प्रशासकीय अधिकृत प्रविण झाले पूजा महतोले देशमा मात्र होईन विदेशमा नाम चिनाएको भन्दै प्रशंसा व्यक्त गरे । उनले सरकारलाई यस्ता प्रतिभावान खेलाडिहरुलाई प्रोत्साहन गर्नु पर्नेमा जोड दिए ।

कार्यक्रममा नेपाली यू–१९ क्रिकेट टोलीकी कप्तान महतोले आफूले देशको शिर उच्च पार्न सधैं क्रिकेटको माध्यमबाट जीवन समर्पित गरिसकेको बताइन् ।

सम्मान कार्यक्रममा पालिका कर्मचारी, स्थानीय, बुद्धिजीवि र संचारकर्मीहरुको उपस्थिती रहेको थियो ।