
महेश सिंह
लहान, माघ १२ गते ।
सिरहाको भगवानपुर गाउँपालिका–२, नहरा रिगौल स्थित लक्ष्मी नारायण कौशल्या जनता माध्यमिक विद्यालयका पूर्वविद्यार्थीहरूले विद्यालयका हालका विद्यार्थीहरूलाई सरकारी सेवातर्फ आकर्षित गर्न विशेष कार्यक्रम सम्पन्न गरेका छन् । कुलत र नकारात्मक गतिविधिबाट टाढा राख्दै विद्यार्थीहरूलाई उज्ज्वल भविष्यतर्फ उन्मुख गराउने उद्देश्यले आयोजना गरिएका यी कार्यक्रमले विद्यालय र समुदायमा सकारात्मक ऊर्जा प्रवाह गरेको छ ।
कार्यक्रमका गतिविधिहरू
माघ ११ गते विद्यालयको प्राङ्गणमा सम्पन्न कार्यक्रममा विभिन्न प्रतियोगितात्मक खेलहरू आयोजना गरियो । म्युजिकल चेयर, राउन्ड मुभिङ रेस, डोरी तान प्रतियोगिता र हाजिरीजवाफजस्ता क्रियाकलापहरूमा विद्यार्थीहरूले उत्साहजनक सहभागिता जनाएका थिए ।

नतिजाहरू:
- म्युजिकल चेयर प्रतियोगिता: छात्रातर्फ लक्ष्मी नारायण कौशल्या जनता मा.वि. बहराले प्रथम स्थान प्राप्त गर्दा हनुमान प्रसाद जनता मा.वि. इनर्वा दोस्रो स्थानमा रह्यो ।
- राउन्ड मुभिङ रेस: छात्रतर्फ बालसुन्दरी मा.वि. भगवानपुरले प्रथम स्थान हासिल गर्यो ।
- डोरी तान प्रतियोगिता: छात्रातर्फ लक्ष्मी नारायण कौशल्या जनता मा.वि. नहरा र छात्रातर्फ बालसुन्दरी मा.वि. भगवानपुरले पहिलो स्थान जिते ।
- हाजिरीजवाफ: लक्ष्मी नारायण कौशल्या जनता मा.वि. नहराले उत्कृष्ट प्रदर्शन गर्दै उपाधि जित्यो।
‘च्याम्पियन्स अफ द इयर’ को उपाधि यस वर्ष लक्ष्मी नारायण कौशल्या जनता मा.वि. नहराले हात पारेको छ ।
पूर्वविद्यार्थीहरूको सक्रियता
विद्यालयका शिक्षक महेश कुमार यादवका अनुसार कार्यक्रम विद्यालयका पूर्वविद्यार्थीहरूले व्यक्तिगत आर्थिक योगदान संकलन गरी सञ्चालन गरेका हुन् । यस वर्षको कार्यक्रम पूर्वविद्यार्थी सरोज कुमार यादवको नेतृत्व र विशेष पहलमा सम्पन्न भएको हो ।
कार्यक्रम संयोजक सरोज यादवले अनुशासन, मर्यादा र निष्पक्षताको साथ कार्यक्रम सम्पन्न भएको जानकारी दिँदै सहभागी विद्यार्थीहरूलाई बधाई ज्ञापन गरे । उनले आगामी वर्षहरूमा अझ प्रभावकारी कार्यक्रम गर्ने प्रतिबद्धता पनि व्यक्त गरे ।

विशेष उपस्थिति र सराहना
विद्यालयका प्रधानाध्यापक जीवछ प्रसाद यादवको अध्यक्षतामा सम्पन्न कार्यक्रममा स्थानीय जनप्रतिनिधि, शिक्षक, अभिभावक र विद्यार्थीहरूको उल्लेखनीय उपस्थिति थियो । प्रधानाध्यापक यादवले कार्यक्रमको प्रभावकारितालाई उल्लेख गर्दै पूर्वविद्यार्थीहरूप्रति आभार व्यक्त गरे ।
पूर्वविद्यार्थी बिनोद कुमार यादवले समुदायका युवाहरूले समाज सुधार र शिक्षित समाज निर्माणमा योगदान पुर्याइरहेको बताउँदै यस प्रकारका कार्यक्रमले नयाँ उदाहरण प्रस्तुत गरेको उल्लेख गरे ।
समुदायमा सकारात्मक प्रभाव
यसखाले कार्यक्रमले विद्यार्थीहरूको सिर्जनात्मकता, प्रतिस्पर्धात्मक भावना र सकारात्मक सोचको विकासमा सहयोग पुर्याएको छ । साथै, सरकारी सेवाप्रति विद्यार्थीहरूको रुचि बढाउने अवसर प्रदान गर्दै समाजमा नयाँ दृष्टान्त स्थापित गर्न मद्दत पुर्याएको छ ।
विद्यालय पूर्वविद्यार्थी मञ्चको तर्फबाट सम्पूर्ण सहभागीलाई धन्यवाद ज्ञापन गर्दै कार्यक्रमले विद्यार्थीहरूको समग्र विकासमा महत्त्वपूर्ण योगदान पुर्याउने विश्वास लिइएको छ ।