राजेश सिंह

गाैशाला, असार १० गते ।
बलवा नगरपालिकाले आर्थिक वर्ष २०८२/८३ का लागि सार्वजनिक गरेको ५२ करोड ९१ लाख ९४ हजार ५७६ रुपैयाँको बजेटमा कृषि, शिक्षा र स्वास्थ्य क्षेत्रलाई प्राथमिकता दिएको छ ।

नगरप्रमुख राम विजय महतोले उक्त बजेटलाई समावेशी, जनउत्तरदायी र दिगो विकासलाई केन्द्रमा राखेर तयार गरिएको बताए। प्रदेशसभा सदस्य तथा प्रमुख अतिथि जैनुल राइनले बलवाको बजेटले स्थानीय आवश्यकतालाई सम्बोधन गरेको प्रतिक्रिया दिएका थिए।

नगर उप–प्रमुख राम दुलारी ठाकुरले नगरसभामा प्रस्तुत गरेको बजेट वक्तव्यअनुसार आर्थिक रूपले आत्मनिर्भर र सामाजिक रूपले समावेशी समाज निर्माणका लागि प्राथमिक क्षेत्रहरूमा विशेष बजेट विनियोजन गरिएको छ ।

बलवा नगरपालिकाले आगामी आर्थिक वर्ष २०८२/०८३ का लागि सार्वजनिक गरेको कुल बजेट ५२ करोड ९१ लाख ९४ हजार ५७६ रुपैयाँ रहेको छ। उक्त बजेटको प्रमुख स्रोत संघीय सरकारबाट प्राप्त अनुदान हो। वित्तीय समानीकरण अनुदान अन्तर्गत ११ करोड ५० लाख रुपैयाँ, सशर्त अनुदानमा २५ करोड ३१ लाख, विशेष अनुदानमा ६७ लाख, सम्पूरक अनुदानमा १ करोड ६२ लाख र राजस्व बाँडफाँड (संघीय) अन्तर्गत १० करोड ८१ लाख ९४ हजार ५७६ रुपैयाँ प्राप्त हुने अनुमान गरिएको छ।

त्यस्तै, आन्तरिक आम्दानीबाट २ करोड रुपैयाँ र स्थानीय तहको राजस्व बाँडफाँडबाट १ करोड रुपैयाँ आम्दानी हुने उल्लेख गरिएको छ।

खर्चतर्फ चालु खर्चका लागि ३ करोड २८ लाख ५९ हजार ४५७ रुपैयाँ र पूँजीगत खर्चका लागि २० करोड ६ लाख रुपैयाँ विनियोजन गरिएको छ।

यसरी सबै श्रोत र खर्चको मिलानमा बलवा नगरपालिकाको अनुमानित कुल बजेट ५२ करोड ९१ लाख ९४ हजार ५७६ रुपैयाँ बराबरको प्रस्तृत गरेका छन् ।

कृषि क्षेत्रमा:

कृषकलाई प्राविधिक सहयोग, मलबीउ अनुदान, सिँचाइ सुविधा र कृषि यान्त्रीकरणका कार्यक्रमलाई बजेटमा प्राथमिकता दिइएको छ। साथै, कृषि उत्पादनमा वृद्धि, युवा कृषक प्रोत्साहन र कृषि बजार पहुँचलाई सरल बनाउने योजना रहेको जनाइएको छ।

शिक्षा क्षेत्रमा:

शैक्षिक गुणस्तर अभिवृद्धिका लागि शिक्षक तालीम, विद्यालय भौतिक पूर्वाधार सुधार, छात्रवृत्ति कार्यक्रम र डिजिटल शिक्षामा जोड दिइएको छ। विद्यालय बाहिर रहेका बालबालिकालाई विद्यालयमा पुनः भर्ना गराउने अभियानलाई निरन्तरता दिने बताइएको छ।

स्वास्थ्य क्षेत्रमा:

स्वास्थ्य चौकीहरूको स्तरोन्नति, सुरक्षित मातृत्व सेवा, नियमित स्वास्थ्य परीक्षण कार्यक्रम, आम नागरिकलाई लक्षित निःशुल्क औषधि वितरण र सरसफाइ तथा पोषणसम्बन्धी जनचेतनामूलक कार्यक्रमलाई बजेटमार्फत अघि बढाइनेछ ।

कार्यक्रममा विभिन्न वडाका अध्यक्ष, राजनीतिक दलका प्रतिनिधि, नागरिक समाज र सर्वसाधारणको उल्लेखनीय उपस्थिति रहेको थियो ।