रौतहट, भदौ ७ गते ।
रौतहटको गौर–सिरसिया सडकखण्ड अन्तर्गत मुडवलबा मोड नजिक शनिबार राति एक संकास्पद सुटकेश फेला परेको छ। राति करिब १०:३० बजे स्थानीयले देखेको सो सुटकेश खोल्दा भित्र महिलाको शव फेला परेको जिल्ला प्रहरी कार्यालय रौतहटले जनाएको छ।

प्रहरीका अनुसार सुटकेश रस्सीले बाँधिएको अवस्थामा भेटिएको थियो। सुटकेश खोलेपछि भित्र अन्दाजी ३०-३५ वर्ष उमेरको महिलाको शव रहेको पाइएको हो।

प्रारम्भिक अनुमानअनुसार महिलाको हत्या गरी शवलाई लुकाउन सुटकेशमा हालिएको हुन सक्ने आशंका गरिएको छ। शवलाई परीक्षणका लागि अस्पताल पठाइएको र घटनाबारे थप अनुसन्धान भइरहेको जिल्ला प्रहरी कार्यालय रौतहटले जानकारी दिएको छ।