काठमाडौं, भदौ २४ गते ।
प्रधानमन्त्री केपी शर्मा ओलीले मंगलबार पदबाट राजीनामा दिएका छन्। उनको सचिवालयले राजीनामा दिएको पुष्टि गरेको छ।

सिंहदरबार र संसद् परिसर प्रदर्शनकारीले केही मिनेटका लागि कब्जा गरेको घटनापछि प्रधानमन्त्रीले पदबाट हट्ने निर्णय लिएका हुन्। यसअघि सोमबार भएको जेन–जी आन्दोलनमा प्रहरीले गोली चलाउँदा १९ जनाको मृत्यु भएको थियो।

मंगलबार आन्दोलन झन् उग्र बनेको थियो। सिंहदरबार र संसद् परिसर कब्जा भएपछि सरकारले तत्कालीन सुरक्षा व्यवस्थामा कडा कदम चाल्न खोजे पनि भीड नियन्त्रण गर्न नसकिएको थियो। त्यसपछि प्रधानमन्त्रीले राजीनामा दिएका हुन् ।

यसैबीच मधेश प्रदेशका मुख्यमन्त्री सरोजकुमार सिंहले पनि मंगलबार पदबाट राजीनामा दिएका छन्। प्रदेश राजधानी जनकपुरधाममा स्थिति तनावग्रस्त भएपछि सरकारले कर्फ्यु आदेश जारी गरेको छ।

महोत्तरी, सर्लाही र रौतहटमा समेत आन्दोलन तीव्र बनेपछि पूर्व–पश्चिम राजमार्ग अवरुद्ध भएको छ। रौतहटमा त प्रदर्शनकारीले प्रहरीको गाडी नै जलाएका छन्।

जेन–जी आन्दोलनले मुलुकको राजनीतिक स्थिरतामा ठुलो प्रश्न खडा गरेको छ। आन्दोलनकारीले भ्रष्टाचार अन्त्य, रोजगारीका अवसर र न्यायपूर्ण शासन प्रणालीको माग गर्दै आन्दोलन चर्काइरहेका छन्।