कपिलवस्तु, कार्तिक १३ गते ।
कपिलवस्तु । कपिलवस्तुमा सवारी दुर्घटना हुँदा एक जनाको मृत्यु भएको छ भने पाँच जना घाइते भएका छन् । शिवराज नगरपालिका–१, बनकसबासामा बिहीबार बिहान करिब दुई बजे यात्रु बस दुर्घटना भएको हो ।
काठमाडौँबाट धनगढीतर्फ जाँदै गरेको बा.प्र.०१–००६ ख ८५०६ नम्बरको यात्रु बस अनियन्त्रित भई सडकमा पल्टिएको प्रहरीले जनाएको छ ।
दुर्घटनाका क्रममा बसले बाटोमा हिँडिरहेका एक पैदल यात्रुलाई ठक्कर दिएको थियो । गम्भीर घाइते भएका ती पुरुषलाई उपचारका लागि चन्द्रौटा आधारभूत स्वास्थ्य सेवा अस्पताल लगिएको थियो । तर, उपचारकै क्रममा उनको मृत्यु भएको प्रहरीले जनाएको छ ।
बसमा रहेका अन्य पाँच जना यात्रुहरू घाइते भएका छन् । उनीहरूको स्थानीय अस्पतालमा उपचार भइरहेको प्रहरीले जानकारी दिएको छ ।
दुर्घटनाको कारणबारे अनुसन्धान भइरहेको प्रहरीले जनाएको छ
