जनकपुरधाम, मंसिर २५ गते 

डडेल्धुराबाट काठमाडौँतर्फ आउँदै गरेको यात्रुबाहक बस दाङको लमही नगरपालिका–१, कौडियापुल नजिक दुर्घटनामा पर्दा २२ यात्रु घाइते भएका छन्।

बिहान करिब ३ बजे ना ८ ख ७४५५ नम्बरको बस अचानक पुलबाट तल खोलामा खसेको प्रहरीले जनाएको छ। बसको पट्टा भाँचिँदा नियन्त्रण गुमेर दुर्घटना भएको प्रारम्भिक निष्कर्ष प्रहरीले निकालेको छ।

बसमा ३८ जना यात्रु थिए। दुर्घटनापछि घाइतेलाई स्थानीय प्रहरीले उद्धार गरी लमही अस्पताल पुर्‍याएको वडा प्रहरी कार्यालय लमहीका निरीक्षक रोशन राज पाण्डेले बताए।

गम्भीर घाइते केहीलाई अन्य केन्द्रमा रिफर गरिएको छ भने अधिकांशको अवस्था सामान्य रहेको जिल्ला प्रहरी कार्यालय दाङले जनाएको छ।

प्रहरीले घटनाबारे थप अनुसन्धान जारी राखेको छ।