काठमाडौँ, चैत १४ गते ।
पूर्व प्रधानमन्त्री केपी शर्मा ओलीलाई मेडिकल जाँचका लागि काठमाडौँ प्रहरी परिसरबाट अस्पताल लगिएको छ। प्रहरीले शनिबार पक्राउ गरेपछि नियमित स्वास्थ्य परीक्षणका लागि उनलाई महाराजगञ्जस्थित टिचिङ अस्पताल लगिएको हो ।

प्रहरी स्रोतका अनुसार पक्राउपछि कानुनी प्रक्रिया अनुसार स्वास्थ्य परीक्षण गराउनुपर्ने भएकाले ओलीलाई प्रहरी परिसरबाट अस्पताल लगिएको हो। मेडिकल जाँच सकिएपछि उनलाई पुनः प्रहरी हिरासतमा राख्ने तयारी गरिएको बताइएको छ ।

जेन–जेड आन्दोलनसँग सम्बन्धित घटनामा अनुसन्धानका लागि ओलीलाई शनिबार बिहान प्रहरीले नियन्त्रणमा लिएको थियो। सोही प्रकरणमा पूर्व गृहमन्त्री रमेश लेखकलाई पनि प्रहरीले पक्राउ गरेको छ ।

पक्राउपछि ओलीलाई काठमाडौँ प्रहरी परिसरमा राखिएको थियो भने स्वास्थ्य अवस्थाबारे चिकित्सकको सल्लाह अनुसार थप प्रक्रिया अघि बढाइने प्रहरीले जनाएको छ ।