रौतहट, चैत १७ गते ।
रौतहट जिल्ला अदालतमा कार्यरत एक कर्मचारी घुस रकमसहित पक्राउ परेका छन् । डिट्ठा पदमा कार्यरत लबकुमार सिंहलाई अख्तियार दुरुपयोग अनुसन्धान आयोगको टोलीले नियन्त्रणमा लिएको हो ।

अख्तियारको हेटौडास्थित कार्यालयबाट खटिएको टोलीले उनलाई ५० हजार रुपैयाँ घुस लिँदै गरेको अवस्थामा पक्राउ गरेको जनाएको छ। सेवाग्राहीसँग अदालतको फैसला अनुसार दाखिला पुर्जी मिलाइदिने र जग्गा फुकुवा गराइदिने भन्दै उनले रकम मागेको आरोप लागेको छ ।

मंगलबार दिउँसो करिब पौन चार बजेतिर अदालत परिसरमै घुस लिँदै गरेको अवस्थामा उनलाई नियन्त्रणमा लिइएको अख्तियारले जानकारी दिएको छ ।

यस घटनासँग सम्बन्धित थप अनुसन्धान जारी रहेको अख्तियार दुरुपयोग अनुसन्धान आयोगले जनाएको छ ।