गाैशाला, चैत २१ गते ।
महोत्तरीको बर्दिवासमा सरकारी सेवाको तयारी गरिरहेका युवाहरूका लागि लक्षित प्रशिक्षण कार्यक्रम सुरु गरिएको छ। शनिबारदेखि यहाँ लोकसेवा आयोग तथा शिक्षक सेवा आयोगको तयारी कक्षा सञ्चालनमा आएको हो, जसले स्थानीय युवाहरूमा नयाँ आशा र उत्साह सिर्जना गरेको छ ।

बर्दिवास नगरपालिकाको आर्थिक सहयोगमा कर्मचारी मिलन केन्द्रद्वारा आयोजना गरिएको उक्त कार्यक्रम तीन महिनासम्म सञ्चालन हुने जनाइएको छ। कार्यक्रमको उद्घाटन नगर प्रमुख प्रह्लाद कुमार क्षेत्री ले गरेका हुन् ।

उद्घाटन अवसरमा बोल्दै उनले युवाको क्षमता विकासमा स्थानीय तहले लगानी गर्नु आवश्यक रहेको बताए। यस्तो पहलले युवालाई प्रतिस्पर्धी बनाउँदै सरकारी सेवामा प्रवेश गर्न सहज वातावरण तयार पार्ने उनको भनाइ थियो ।

हाल सञ्चालनमा रहेको कक्षामा ४५ जना प्रशिक्षार्थी सहभागी छन्। उनीहरूलाई अनुभवी प्रशिक्षकमार्फत सैद्धान्तिक ज्ञानसँगै व्यावहारिक सीप प्रदान गरिनेछ ।

स्थानीय स्तरमै यस्तो सुविधा उपलब्ध हुँदा बाहिर गएर महँगो शुल्क तिर्नुपर्ने अवस्था घट्ने विश्वास गरिएको छ। यसबाट विद्यार्थी र अभिभावक दुवैलाई राहत मिल्नुका साथै सकारात्मक उत्साह थपिएको छ ।

कार्यक्रम कर्मचारी मिलन केन्द्रका अध्यक्ष सुनिल शर्मा पौडेल को अध्यक्षतामा सम्पन्न भएको थियो। कार्यक्रममा प्रमुख प्रशासकीय अधिकृत राममणि अधिकारी, वडा नं. १४ का अध्यक्ष तथा नगर प्रवक्ता विजय कुमार महतो लगायत विभिन्न क्षेत्रका प्रतिनिधिहरूको उपस्थिति रहेको थियो ।

यस प्रकारका कार्यक्रमहरूले युवाहरूलाई गुणस्तरीय तयारीको अवसर प्रदान गर्नुका साथै स्थानीय सरकार, संस्था र समुदायबीच सहकार्यको राम्रो उदाहरण प्रस्तुत गरेका छन् ।