काठमाडौँ, बैशाख २ गते ।
देशभर आज मौसममा आंशिक परिवर्तन देखिएको छ। हाल नेपालमा पश्चिमी वायु तथा स्थानीय वायुको प्रभाव कायम रहेकाले विभिन्न क्षेत्रमा बदली र वर्षाको सम्भावना रहेको मौसमविद्हरूले बताएका छन् ।

मौसम पूर्वानुमान अनुसार अहिले हिमाली क्षेत्रमा सामान्यदेखि पूर्ण बदली रहेको छ भने पहाडी भू-भागमा आंशिक बदली देखिएको छ। तराईका जिल्लाहरूमा भने मौसम सामान्यतया सफा रहँदै घाम लाग्ने अवस्था रहेको छ ।

विशेषगरी कोशी प्रदेश, बागमती प्रदेश, गण्डकी प्रदेश र कर्णाली प्रदेशका हिमाली तथा पहाडी क्षेत्रमा हल्का वर्षा र केही स्थानमा हिमपातसमेत भइरहेको जनाइएको छ ।

आज दिनभर कोशी प्रदेशका पहाडी भू-भाग तथा देशका अन्य हिमाली क्षेत्रमा बदली रहने सम्भावना छ। साथै पहाडी क्षेत्रका केही स्थानमा मेघगर्जन र चट्याङसहित हल्का वर्षा हुन सक्ने पूर्वानुमान गरिएको छ। गण्डकी प्रदेशका पहाडी क्षेत्रका एक–दुई स्थानमा पनि वर्षा र हिमपातको सम्भावना देखिएको छ ।

मौसममा आएको यस परिवर्तनले विशेषगरी पहाडी तथा हिमाली क्षेत्रमा सामान्य प्रभाव पार्न सक्ने भएकाले आवश्यक सतर्कता अपनाउन मौसमविद्हरूले सुझाव दिएका छन् ।