काठमाडौं : दुर्गम पहाडी जिल्ला अछामको एउटा सामान्य परिवारबाट सुरु भएको तीन दाजुभाइको यात्रा अहिले राष्ट्रसेवाको प्रेरणादायी कथामा परिणत भएको छ। एउटै परिवारका तीन दाजुभाइ नेपाल प्रहरीमा प्रवेश गरी जिम्मेवार तहसम्म पुगेर देश र नागरिकको सेवामा सक्रिय छन् ।

डीएसपी सिद्धराज न्यौपाने, डीएसपी केशर न्यौपाने र इन्सपेक्टर मुकेश न्यौपाने एउटै आमाको कोखबाट जन्मिएका दाजुभाइ हुन्। तीनै जनाले आफ्नो व्यावसायिक जीवनका लागि नेपाल प्रहरीलाई रोजे र फरक–फरक जिम्मेवारीमा रहेर राष्ट्रसेवामा योगदान दिँदै आएका छन् ।

कार्यजिम्मेवारी र कार्यक्षेत्र फरक भए पनि तीनै दाजुभाइको मूल उद्देश्य भने एउटै छ—राष्ट्रको सेवा, नागरिकको सुरक्षा र कानुनको कार्यान्वयन ।

अछामको सामान्य पारिवारिक परिवेशमा हुर्किएका उनीहरूको सफलताले अवसर सीमित भए पनि दृढ इच्छाशक्ति, अनुशासन, निरन्तर मेहनत र सकारात्मक पारिवारिक संस्कारले मानिसलाई लक्ष्यसम्म पुर्‍याउन सकिन्छ भन्ने उदाहरण प्रस्तुत गरेको छ ।

तीन दाजुभाइको सफल यात्राको पछाडि अभिभावकको भूमिका पनि महत्वपूर्ण देखिन्छ। उनीहरूका पिता देवानन्द न्यौपाने शिक्षक हुन्। शिक्षण पेसामार्फत समाजमा ज्ञान र चेतनाको उज्यालो फैलाउँदै आएका देवानन्दले आफ्ना सन्तानमा पनि सेवाभाव, अनुशासन र जिम्मेवारीको संस्कार विकास गराएको परिवारजन बताउँछन् ।

आमा पारु न्यौपाने र पिता देवानन्दको त्याग, मेहनत तथा संस्कारले तीनै सन्तानलाई राष्ट्रसेवातर्फ प्रेरित गरेको परिवारको भनाइ छ ।

दुर्गम भूगोल र सीमित अवसरका बीच हुर्किएर नेपाल प्रहरीको जिम्मेवार तहसम्म पुग्नु आफैंमा चुनौतीपूर्ण यात्रा हो। तर निरन्तर प्रयास र लक्ष्यप्रतिको प्रतिबद्धताले त्यो चुनौतीलाई अवसरमा बदल्न सकिन्छ भन्ने सन्देश न्यौपाने दाजुभाइको यात्राले दिएको छ ।

एउटै परिवारका तीन सन्तान प्रहरी सेवामा प्रवेश गरेर जिम्मेवार पदमा पुग्नु सामान्य संयोग मात्र होइन, परिवारको वातावरण, अभिभावकको मार्गदर्शन र सन्तानको मेहनतबीचको बलियो सम्बन्धको उदाहरणसमेत हो ।

अछामको एउटा सामान्य घरबाट सुरु भएको उनीहरूको यात्रा अहिले परिवारको गौरवमा मात्र सीमित छैन। यसले जन्मभूमि अछामसँगै सुदूरपश्चिमका युवालाई पनि ‘परिस्थिति जस्तोसुकै भए पनि लक्ष्यप्रतिको दृढता र निरन्तर मेहनतले सफलता सम्भव छ’ भन्ने प्रेरणा दिएको छ ।

तीन दाजुभाइले प्रहरी सेवामार्फत निर्वाह गरिरहेको जिम्मेवारीले उनीहरूको परिवारलाई मात्र होइन, जन्मभूमि अछाम र समग्र सुदूरपश्चिमलाई नै गौरवान्वित बनाएको छ । एउटै परिवारबाट राष्ट्रसेवामा समर्पित तीन भाइको यो यात्रा आगामी पुस्ताका लागि पनि प्रेरणाको स्रोत बन्ने देखिन्छ ।