काठमाडौं : यतिको जहाज रनवे पुग्न १० सेकेण्ड मात्रै बाँकी थियो । यति एयरको एटिआर जहाज नाइनवाइटी ६९१, नाइनएन-एएनसी जहाज काठमाडौंबाट १०:३२ मा उडेको थियो । उक्त जहाज पोखरा विमानस्थलमा १०:५८ मा अवतरण हुनुपर्ने थियो ।

नेपाल नागरिक उड्डयन प्राधिकरणका अनुसार मौसम सफा थियो। उक्त जहाजले पोखरा विमानस्थलमा अवतरणको अनुमति लिइसकेको अवस्था थियो । उक्त जहाजले १०:५० मा टावरसँग ल्याण्डिङको अनुमति लिइसकेको थियो । अनुमति लिइसकेको अवस्थामा उक्त जहाज पोखरा विमानस्थलबाट १.७ किलोमिटर टाढा थियो। यो बेला जहाज अवतरण गर्ने चरणमा थियो ।

१०:५० र १०:५८ बीच केही समय जहाज सम्पर्कमा आएन, एकाएक जहाज १०:५८ मा सम्पर्कमा आयो । त्यतिबेला जहाज दुर्घटनामा परिसकेको थियो । ‘पाइलटले त्यो बेला सेती खोंच भनिरहेको थाहा भएको छ, ’प्राधिकरणका प्रवक्ता जगन्नाथ निरौलाले नवपथसँग भने, ‘ल्याण्डिङ हुन १० सेकेन्ड मात्रै बाँकी थियो ।

‘अवतरणका लागि पोखरा विमानस्थलको टावरले अनुमति दिइसकेको अवस्था थियो,’ निरौलाले थपे, ‘तर जहाज एक्कासि सेती खोंचमा झरेको देखिन्छ, यो कसरी भयो भन्ने अनुसन्धानले मात्रै पत्ता लगाउने कुरा भयो । उनका अनुसार पोखरामा दुईतिरबाट जहाज अवतरण हुन्छन्। यतिको जहाज आइतबार पश्चिमतर्फबाट अवतरण हुन लागेको थियो ।

उनका अनुसार जहाजमा प्राविधिक गडबडी थिएन, पाइलटले त्यो जानकारी पनि दिएका थिएनन् । तर, टावरले अनुमति दिइसकेको केही समय जहाज सम्पर्कविहीन भयो । सम्पर्कविहीन भएपछिको केहीबेरमा पाइलटले टावरलाई ‘सेती खोंच’ भनेर रिपोर्ट गरे । त्यो सम्पर्कविहीन भएको कति समय हो, पत्ता लागेको छैन, ’निरौलाले भने ।

‘यसपछि जहाज दुर्घटना भएर आगो लागिरहेको खबर आएको हो, अन्तिमपटक पाइलटले १०:५० मा टावरलाई सम्पर्क गरेको देखियो, ’उनले भने । जहाजमा आकस्मिक रूपमा के समस्या आयो भन्ने कुरा ‘रहस्य’मै छ । तर, अहिलेसम्म प्राप्त भिडिओबाट जहाजले रनवेतर्फ ‘टर्न’ गरेको देखिएको र ‘टर्न’ गर्दा ‘ओभर टर्न’ गरेको देखिएको उनले बताए ।

‘ओभर टर्न गरेको देखिन्छ, तर यो चाहिँ अनुसन्धानबाट पत्ता लाग्ने कुरा हो,’ निरौलाले भने । उनका अनुसार काठमाडौंमा जहाजको प्राविधिक परीक्षण गरिएको थियो। परीक्षण गर्दा जहाजमा कुनै समस्या थिएन ।

‘ल्याण्डिङको अनुमति दिँदा पनि जहाजमा समस्या भएको भनी पाइलटले भनेनन्,’ निरौलाले भने, ‘एयर डिस्टेन्स १.७ किलोमिटर थियो, जहाज ल्याण्ड गर्दैथियो, एकैचोटि ढल्केर जहाज सेती खोंचमा खसेको देखिन्छ ।

उनका अनुसार जहाज साधारण अवस्थाभन्दा बढी दरमा ‘टर्न’ गरेको देखिन्छ । सरकारले यतिको जहाज दुर्घटना छानबिनका लागि समिति गठन गरिसकेको छ। उक्त समितिलाई ४५ दिनको समय दिइएको छ । जहाजमा ६८ यात्रु र चार जना चालक दलका सदस्य थिए ।