गौशाला : महोत्तरीको बर्दिवास नगरपालिकामा दोस्रो मेयर कप फुटबल प्रतियोगिता सुरु भएको छ । एन्फाबाट स्वीकृति लिएर बर्दिवासमा राष्ट्रिय स्तरको यो पहिलो खेल आयोजना गरिएको आयोजक नगर खेलकुद विकास समिति बर्दिवासका अध्यक्ष दीपेन्द्रकुमार शिवभक्तिले जानकारी दिए ।

बिहीबारबाट सुरु भएको फुटबल प्रतियोगिता फागुन ४ गतेसम्म चल्ने आयोजक समितिले जनाएको छ । प्रतियोगितामा माघ २६ गते वाग्मती युवा क्लब सर्लाही र गते वीरगन्ज युनाइटेड पर्सा, २७ गते बर्दिवास युथ क्लब बर्दिवास र पेमा युवा क्लब विराटनगर, २८ गते क्यामरुन एफ सी काठमाडौँ र झापा-११‚ २९ गते ब्वाइज युनियन क्लब काठमाडौं र धरान फुटबल क्लबबीच प्रतिस्पर्धा हुने शिवभक्तिले जानकारी दिए । १ र २ गते सेमिफाइनल र ४ गते फाइनल खेल हुने आयोजकले जनाएको छ ।

बिहीबार खेलको उद्घाटन गर्दै बर्दिवास नगपालिकाका नगरप्रमुख प्रह्लादकुमार क्षेत्रीले बर्दिवासमा फुटबलमात्रै नभएर समग्र खेल र खेलाडीका लागि नगरले लगानी गर्ने बताए । विभिन्न प्रतियोगिता गराउँदै यस क्षेत्रका खेलाडीको क्षमता अभिवृद्धि गर्ने र राष्ट्रिय स्तरका प्रतियोगितामा सहभागी गराउने गरी काम अघि बढाउने क्षेत्रीले बताए ।