नूर आलम बादशाह
सिम्रौनगढ़, चैत १४ गते ।
बाराको सिम्रौनगढ़मा मंगलबार बिहान भएको आगलागीबाट छ घर गोठ जलेर नष्ट भएको छ । जिल्लाको सिम्रौनगढ़ नगरपालिका–२ रानिवास बजारमा लागेको आगोले करिब १० लाखको क्षति भएको ईलाका प्रहरी कार्यालय सिम्रौनगढ़ले जनाएको छ ।

स्थानीय रामप्रीत हाजराको घरबाट सुरु भएको आगोले रामसूरत हाजरा, लालबाबू पासवान, राजेश पासवान, रमेश पासवान र गगनदेव पासवानको घर गोठ जलेर नष्ट भएको वडाध्यक्ष अरबिंद मुखियाले बताए ।

रामप्रीत हाजराको गोठमा लाम्खुट्टे धपाउनका लागि राखिएको घुरबाट सल्केको आगोले उक्त आगलागी भएको हो।

आगोले भैंसी, मोटर साईकल, साईकल, मोटर, नगद, अन्नपात, लत्ताकपडालगायत घरमा रहेका सामग्रीहरू पूर्णरूपमा जलेका छन् । बिहान ३ बजेदेखि लागेको आगो एक घण्टामा स्थानीय प्रहरी र दमकलको सहयोगमा निभाइएको थियो । तराईका जिल्लामा गर्मी मौसममा हावाहुरी लाग्ने भएकाले फुसको छानो भएका घर उच्च जोखिममा रहेका छन् ।