जनकपुरधाम, मंसिर ६ गते ।

जनता समाजवादी पार्टी (जसपा) नेपाल धनुषा जिल्ला कार्यसमितिको विस्तारित बैठक जिल्ला अध्यक्ष पशुपति यादवको अध्यक्षतामा सम्पन्न भएको छ। जिल्ला पार्टी कार्यालयमा आयोजित उक्त बैठकमा केन्द्रीय तथा प्रदेशस्तरीय नेतृत्वको उपस्थिति रहेको थियो।

बैठकका प्रमुख अतिथि जसपा नेपाल केन्द्रीय समिति सदस्य तथा मधेस प्रदेश सांसद रामअशिष यादव रहेका थिए। यस्तै, केन्द्रीय ममता मण्डल, चमेलिदेवी दास, बिमल साह, पूर्व प्रदेश सांसद शैलेन्द्र यादव, दलित मुक्ति मोर्चाका केन्द्रीय महासचिव रामु महरा, जसपा नेपालका नेता शत्रुधन यादव लगायतको सहभागिता थियो।

केन्द्रीय समितिको मंसिर ३ र ४ गते बसेको बैठकबाट पारित कार्यसूची, कार्यक्रम, आन्दोलन तथा विभिन्न तहका निकायलाई बुझाइने ज्ञापनपत्र लगायतका निर्णयहरूको प्रभावकारी कार्यान्वयन गर्ने उद्देश्यले धनुषा जिल्लामा विस्तारित बैठक आयोजित गरिएको जिल्ला अध्यक्ष यादवले जानकारी दिए।

सो बैठकले प्रत्यक्ष कार्यकारी राष्ट्रपति, पुर्ण समावेशी संसद, स्वायत्त अधिकार सम्पन्न प्रदेश,समान जनसंख्याका आधारमा निर्वाचन क्षेत्र,राज्य पुनर्संरचना, १४ वर्ष देखि अलपत्र रहेको कमला पुलको निर्माण, बेरोजगारी समस्या, स्वास्थ्य, शिक्षा, कृषि सुधार,संविधान पुनर्लेखन/ संशोधन सहित २८ बुंदे माग गर्दै जन संघर्ष तथा शान्तिपूर्ण विरोध प्रदर्शन कार्यक्रम केन्द्रीय समितिको परिपत्र अनुसार संचालन गर्ने सर्वसहमतिले निर्णय गरिएको छ।