काठमाडौं, माघ १६ गते ।
लोकतन्त्र स्थापना तथा पुनर्स्थापनाका लागि जीवन उत्सर्ग गर्ने नेपाली अमर शहीदहरूको सम्झनामा आज देशभर राष्ट्रिय शहीद दिवस श्रद्धा र सम्मानका साथ मनाइएको छ । राजधानी काठमाडौंको शान्तिवाटिका, रत्नपार्कदेखि लैनचौरस्थित शहीद स्मारकसम्म श्रद्धालुहरूको उल्लेख्य उपस्थिति देखिएको थियो ।

यसै अवसरमा भारतका अन्तर्राष्ट्रिय ख्यातिप्राप्त लीफ आर्टिस्ट मधुरेन्द्र कुमारले अनौठो र सृजनात्मक कलामार्फत नेपाली शहीदहरूप्रति विशेष सम्मान व्यक्त गर्नुभएको छ । उहाँले विश्वकै अत्यन्त सानो हरियो पीपलको पातमा सूक्ष्म कलाकृति उकेरि नेपाली अमर शहीदहरूको बलिदानलाई अन्तर्राष्ट्रिय स्तरमा चिनाउनुभएको हो ।

करिब पाँच घण्टाको निरन्तर साधनापछि तयार गरिएको उक्त कलाकृतिमा वि.सं. १९९७ सालमा लोकतन्त्रका लागि संघर्ष गर्दै वीरगति प्राप्त गरेका शुक्रराज शास्त्री, धर्मभक्त माथेमा, गंगालाल श्रेष्ठ र दशरथ चन्दको स्मृतिलाई जीवन्त रूपमा प्रस्तुत गरिएको छ । कलाकृतिमा नेपालको राष्ट्रिय झण्डासहित “माघ १६ जय नेपाल” र “शहीदहरूलाई सलाम” भन्ने भावनात्मक सन्देश अंकित गरिएको छ ।

उक्त कलाकृतिको तस्वीर सामाजिक सञ्जालमार्फत तीव्र रूपमा फैलिँदै प्रशंसा बटुलिरहेको छ। पत्रकारहरूसँग कुरा गर्दै कलाकार मधुरेन्द्र कुमारले वि.सं. २०१२ सालदेखि तत्कालीन काठमाडौं नगरपालिकाको पहलमा माघ १६ लाई राष्ट्रिय शहीद दिवसका रूपमा मनाउन थालिएको जानकारी दिनुभयो । उहाँले शहीदहरूको त्याग, साहस र राष्ट्रप्रतिको समर्पणलाई सधैं स्मरण गरिनुपर्ने बताउनुभयो ।

आजको दिन नेपाली शहीदहरूको अदम्य साहस र बलिदानलाई स्मरण गर्दै गर्वका साथ मनाइएको छ । यस अवसरमा प्रधानमन्त्री, मन्त्रीहरू, उच्च सरकारी अधिकारी, जनप्रतिनिधि, सुरक्षा निकाय तथा नागरिक समाजका प्रतिनिधिहरूले शहीद स्मारकमा पुगेर ज्ञात तथा अज्ञात शहीदप्रति श्रद्धाञ्जली अर्पण गरेका छन् ।