नवलपुर, जेष्ठ ३१ गते ।
नवलपुरको गैँडाकोट क्षेत्रमा भारतीय नम्बर प्लेटको कारले स्कुटरलाई ठक्कर दिँदा एक वृद्धाको मृत्यु भएको छ भने एक जना घाइते भएकी छन् ।

पूर्व–पश्चिम राजमार्ग अन्तर्गत नारायणघाटबाट कावासोतीतर्फ जाँदै गरेको भारतीय नम्बर प्लेटको कारले स्कुटरलाई ठक्कर दिएको जिल्ला प्रहरी कार्यालय नवलपुरले जनाएको छ ।

दुर्घटनामा स्कुटरको पछाडि सवार सावित्री भुसाल गम्भीर घाइते भएकी थिइन्। उपचारका लागि भरतपुरस्थित नयाँ मेडिकल कलेज लगिए पनि उपचारकै क्रममा उनको मृत्यु भएको प्रहरीले जनाएको छ ।

त्यस्तै स्कुटर चालक सीता भुसाल घाइते भएकी छन्। उनको भरतपुरमा उपचार भइरहेको र स्वास्थ्य अवस्थाबारे थप विवरण आउन बाँकी रहेको छ ।

घटनापछि प्रहरीले दुर्घटनामा संलग्न कार, स्कुटर तथा कार चालक करुणा निधान मिश्र लाई नियन्त्रणमा लिएको जनाएको छ। दुर्घटनाको कारणबारे थप अनुसन्धान भइरहेको प्रहरीले जनाएको छ ।

यस घटनाले पूर्व–पश्चिम राजमार्गमा सवारीसाधनको गति नियन्त्रण र सडक सुरक्षाको विषयलाई पुनः चर्चामा ल्याएको छ ।