गाैशाला: हिन्दु धर्मावलम्बीहरूको महत्वपूर्ण धार्मिक तथा सांस्कृतिक पर्व गणेश चतुर्थी तथा हरितालिका तीज देशभर श्रद्धा, भक्ति र उल्लासका साथ मनाइँदैछ। पर्वको अवसरमा बिहानैदेखि विभिन्न मन्दिर तथा धार्मिक स्थलमा भक्तजनको चहलपहल बढेको छ ।

हरितालिका तीजका अवसरमा महिलाहरूले भगवान् शिव र माता पार्वतीको पूजा–आराधना गर्दै व्रत बसेका छन् । विवाहित महिलाले श्रीमान्को दीर्घायु, सुख–समृद्धि र पारिवारिक शान्तिको कामना गर्दै तथा अविवाहित महिलाले असल जीवनसाथीको कामना गर्दै तीजको व्रत बस्ने धार्मिक परम्परा रहेको छ ।

तीजका अवसरमा महिलाहरू रातो तथा विभिन्न रंगका पहिरन र गरगहनामा सजिएर शिवालय तथा अन्य धार्मिक स्थलमा पुग्ने गरेका छन्। मन्दिरमा पूजा–आराधना, दर्शन तथा शिव–पार्वतीको स्तुति गर्ने क्रमसँगै महिलाहरूले तीजका गीत गाउँदै नाचगानसमेत गरिरहेका छन्। यसले गाउँ, टोल तथा बजार क्षेत्रमा पर्वको रौनक थपिएको छ ।

यसैगरी, भगवान् गणेशको जन्मोत्सवका रूपमा मनाइने गणेश चतुर्थीका अवसरमा गणेश मन्दिर तथा घरघरमा गणेश भगवान्को विशेष पूजा–आराधना गरिएको छ। भक्तजनले गणेशको प्रतिमामा फूल, अक्षता, दुबो, लड्डुलगायतका प्रसाद चढाएर पूजा गर्ने गरेका छन्। धार्मिक मान्यताअनुसार भगवान् गणेशलाई विघ्नहर्ता तथा शुभकार्यका देवताका रूपमा पूजा गर्ने गरिन्छ ।

गणेश चतुर्थी र हरितालिका तीजको अवसरमा विभिन्न स्थानमा धार्मिक कार्यक्रम, भजन–कीर्तन तथा सांस्कृतिक कार्यक्रमसमेत आयोजना भइरहेका छन्। बिहानैदेखि मन्दिर तथा पूजा स्थलमा पुग्ने भक्तजनका कारण धार्मिक क्षेत्रमा विशेष चहलपहल देखिएको छ ।

पर्वलाई लक्षित गरी स्थानीय स्तरमा सुरक्षा तथा व्यवस्थापनका लागि समेत आवश्यक तयारी गरिएको छ। मन्दिर तथा धार्मिक स्थलमा पूजा गर्न आउने भक्तजनलाई सहज रूपमा दर्शन तथा पूजाआजा गर्ने वातावरण बनाउन सम्बन्धित पक्षले व्यवस्थापन मिलाएका छन् ।

परम्परागत रूपमा मनाइँदै आएका गणेश चतुर्थी र हरितालिका तीजले धार्मिक आस्थासँगै नेपाली समाजको मौलिक संस्कृति, परम्परा र सामाजिक सम्बन्धलाई समेत बलियो बनाउँदै आएको छ। पछिल्लो समय तीज मनाउने क्रममा देखिने तडकभडक र अनावश्यक खर्चलाई कम गर्दै पर्वको धार्मिक तथा सांस्कृतिक महत्वलाई संरक्षण गर्नुपर्नेमा समेत जोड दिइँदै आएको छ ।

यस वर्ष पनि विभिन्न स्थानमा महिला तथा भक्तजनहरूले आपसी सद्भाव, प्रेम र भाइचाराका साथ पर्व मनाइरहेका छन्। पर्वका माध्यमबाट परिवारमा सुख, शान्ति, समृद्धि तथा सबैको सुख–स्वास्थ्यको कामना गरिएको छ ।