काठमाडौं: सोमबार बसेको मन्त्रिपरिषद्को बैठकले संस्कृति पर्यटन तथा नागरिक उड्डयनमन्त्री प्रेम आले र नेपाल वायुसेवा निगमका अध्यक्षबीच भएको विवाद छानबिन गर्न एक समिति गठन गरेको छ ।
असार ३ गते निगमका अध्यक्ष युवराज अधिकारी र प्रेम आलेबीच विवाद भएको अडियो बाहिरिएको थियो जसमा आलेले नेपाल वायुसेवा निगमका अध्यक्षमाथि अश्लील बोल्दै कुटपिट गर्न खोजेको विवरण थियो ।
आले पटक पटक अनेक बहानामा विवादमा पर्दै आएका छन् । यसअघि पनि उनले कामको सिलसिलामा भारतमा रहिरहेका एक युवकलाई गालीगलौज गरेको भिडियो सार्वजनिक भएको थियो ।
पछिल्लोपटक अधिकारीसँग अश्लील शब्द प्रयोग गरी गाली गरेको अडियो सार्वजनिक भएसँगै फेरी विवादमा तानिएका हुन् । त्यसले सामाजिक सञ्जालमा उनको चर्को विरोध भएको थियो । तर उनलाई उनको पार्टी नेकपा एसले भने कुनै पनि कारबाहीको निर्णय लिएको थिएन। ।
अघिल्लो पटक आलेको राजीनामा समेत माग भएको थियो । तर उनको सचिवालयले त्यतिबेला तथ्यहीन आरोप लगाउन खोजेको भन्दै खण्डन गरेको थियो ।
अहिले पनि आलेको सचिवालयले नेपाल वायुसेवा निगमका अध्यक्षलाई सम्झाउन मात्रै खोजेको तर हातपात नगरेको जिकिर गरेको थियो ।
प्रतिक्रिया दिनुहोस् !